Showing posts with label தமிழன். Show all posts
Showing posts with label தமிழன். Show all posts

Sunday, May 1, 2011

தலைவர் பிராபாகரன் மகள் -கரும்புலியாகி வெடித்து வீரசாவு

தலைவர் பிரபாகரின் அருமை புதல்வி துவராக அவர்கள் முள்ளி வாய்க்கள்பகுதியில் சிங்கள இனவெறி படைகளுடன் நடைபெற்ற தாக்குதலின் போது கரும்புலியாகி வீர காவியம் படைத்துள்ளதாக முள்ளி வாய்க்கள் கட்டளை தளபதி கேணல் கஜனின் துணைவியார் தெரிவித்துள்ளார் .
தமிழீழ விடுதலை புலிகள் மாபெரும் ஊடறுப்பு தாக்குதல் ஒன்றை நடத்தி இருபது மைல் தொலைவில் பாரிய
நில மீட்பு சமரை நடத்த தாக்குதல் திட்டம் தலைவரால் படைத்துறை தளபதிகளிற்கும் போராளிகளுக்கும் விளங்க படுத்தி கொண்டிருந்த வேளை அதற்குள் இருந்த சில நபர்கள் ஊடாக எதிரிக்கு தகவல் பரிமாறப்பட்ட நிலையில்
இருபதாயிரம் படைகளை ஒன்று குவித்து பாரிய தாக்குதலை சிங்களம் நடத்தியது .

அந்த தாக்குதலில் தலைவரை காக்கும் உயரிய உச்ச கட்ட தாக்குதலின் போது பிரிகேடியர் விதுசா ,பிரிகேடியர் துர்க்க .பிரிகேடியர் மணிவண்ணன் .வீரசாவை தழுவி கொண்டனர் .
இவர்களுடன் மேலும் பதினொரு தளபதிகள்வீரசாவு என சிங்களம் அறிவித்தது . இந்த இராணுவ முற்றுகைக்குள் இருந்து தலைவர் பிரபாகரனை மீட்டு பாதுக்காப்பான தளத்திற்கு முள்ளி வாய்க்கள் கட்டளை தளபதி கஜணினால் மேற்கொள்ள பட்டுஅழைத்து செல்ல பட்டார் .
அந்த களத்தினிலே சொர்ணம் அவர்கள் வீர காவியம் படைத்தார் . இந்த களத்தின் பின்னர் முள்ளி வாய்க்கள் பகுதியில் நடைபெற்ற தக்குதளினிலே தலைவர் மகள் துவராக கரும்புலியாக வெடித்து எதிரே வந்த படையினரை தாக்கி அளித்தார் . இவரே இறுதியில் மாலதி படையணியை வழி நடத்தியதாக தெரிவிக்க பட்டுள்ளது .
இவருடன் கூடவே தளபதி சொர்ணம் அவர்களின் மகளும் வீர காவியம் அடைந்துள்ளார் என அவர் தெரிவித்துள்ளார் .
தமிழினத்தை காக்க தமது குடுப்பதில் பலரை நாட்டுக்காக அர்பணித்த தலைவர் அவரின் இந்த நிலையினை கேட்டு
உலக தமிழினம் கண்ணீர் வடிக்கின்றனர் .
இதைவிட மேலும் பல செய்திகள் தமிழர்களை உலுப்பும் என எதிர் பார்க்க படுகின்றது …!
அத்துடன் பலரிடம் மக்கள் கேள்வி தொடுக்கும் நிலையும் தற்போது குழப்பத்தை உருவாக்கி கொண்டு இருபவர்களின் செயலுக்கு முற்று புள்ளி வைக்க படும் என தெரிவிக்க படுகின்றது .

Wednesday, April 20, 2011

கனடியத் தமிழர் பே ரவை ஊடக அறிக்கை: தமிழின உணர்வாளர்கள் தீக்குளிப்பதை தவிர்த்து போராட வேண்டும்!


தமிழின உணர்வாளர்கள் தீக்குளிப்பதை தவிர்த்து போராட வேண்டும்!
ஸ்ரீலங்காவில் இடம்பெற்ற போர்க் குற்றச் செயல்கள் தொடர்பான ஐ.நா.வின் அறிக்கை வெளி வந்துள்ள வேளையில் ஸ்ரீலங்கா ஜனாதிபதி மஹிந்த ராஜபக்ஷ தண்டிக்கப்பட வேண்டும் என வலியுறுத்தி நெல்லை மாவட்டத்தில் உள்ள சீகம்பட்டி கிராமத்தில் இளம் பொறியியலாளரான கிருஷ்ண மூர்த்தி என்ற இளைஞர் தனக்குத் தானே தீ மூட்டி தீக்குளித்துள்ளார். அவரது உணர்வு பூர்வமான இத்தியாக நிகழ்வானது எம்மை அதிர்ச்சிக்கும், ஆறாத் துயருக்கும் ஆளாக்கி உள்ளது. விலை மதிப்பற்ற உயிரை அவர் தியாகம் செய்துள்ளமை எம்மை மெய்சிலிர்க்க வைத்துள்ளது. அவரது இன உணர்வினை நாம் மெச்சும்
அதேவேளையில் இது போன்று தமிழ் நாட்டில் இன்னுமொரு உயிர்ப்பலி ஏற்படக் கூடாது. இதுவே இறுதி உயிர்ப்பலியாக இருக்கட்டும்.
மஹிந்த ராஜபக்ஷ தண்டிக்கப்பட வேண்டும், இந்தியா ஸ்ரீலங்காவுக்கு உதவக் கூடாது இவற்றைக்கண்டிப்பதற்காகவே நான் தீக்குளிக்கிறேன் என கடிதம் எழுதி வைத்து விட்டு அவர் தீக்குளித் துள்ளார்.
இத்தகைய இன உணர்வுள்ள இளந்தலைமுறையினர், தமிழ் மக்களின் இதயத்தை ஈட்டிபோல் தைக்கும் இன்னுயிர் தியாகத்தைக் கைவிட்டு தமிழினத்தின் நலனுக்காகப் பாடுபடும் அரசியல் கட்சிகளில் இணைந்து அரசியல் ரீதியான நடவடிக்கைகளை மேற்கொள்ள வேண்டும் என்பதே எமது பணிவான வேண்டுகோளாகும் என கனடாவிலுள்ள தமிழர் பேரவையின் பேச்சாளரான டேவிட் பூபாலபிள்ளை வேண்டுகோள் விடுத் துள்ளார்.

Monday, April 11, 2011

தங்கபாலு மக்களுக்கு பணப்பட்டுவாடா செய்கிறார்: இளைஞர் காங்கிரஸ் புகார்

தமிழக தலைமை தேர்தல் அதிகாரி பிரவீண்குமாரிடம் மயிலை தொகுதி இளைஞர் காங்கிரஸ் தலைவர் டி.விஜயசேகர் அளித்த புகாரில் கூறியிருப்பதாவது: மைலாப்பூர் தொகுதியில் போட்டியிடும் காங்கிரஸ் வேட்பாளர் தங்கபாலு, அப்பாவி வாக்காளர்களை கண்டறிந்து ஓட்டுக்கு தலா ரூ.1,000 முதல் ரூ.1,500 வரை விநியோகம் செய்துள்ளதாக அந்த தொகுதி மக்கள் என்னிடம் தெரிவித்தனர்.
மேலும், தொகுதியில் உள்ள ஒரு லட்சம் வாக்காளர்களுக்கு தலா ரூ.500 வீதம் பணப்பட்டுவாடா செய்யவும் திட்டமிட்டு அதற்காக ஆட்களை அமர்த்தியுள்ளார். இதன்மூலம் ஒரு லட்சம் வாக்காளர்களுக்கு கொடுப்பதற்காக ரூ.5 கோடி வரை ஒதுக்க திட்டமிட்டு இருக்கிறார்.
ராகுல்காந்தி கொள்கைக்கு மாறாகவும், நேர்மையான வழிகாட்டுதலுக்கு எதிராகவும் இத்தகைய முறைகேடுகளில் ஈடுபட்டுள்ள தங்கபாலுவை வன்மையாக கண்டிக்கிறேன். மைலாப்பூர் தொகுதியில் தேர்தல் நேர்மையாக நடைபெற தேர்தல் கமிஷன் நடவடிக்கை எடுக்க வேண்டும். இவ்வாறு மனுவில் கூறப்பட்டுள்ளது.

72 முறை குருதி கொடுத்த பெரியார் தொண்டர் : மதுரை வரதராஜன்

”தானத்தில் சிறந்தது ரத்த தானம்” என்பார்கள். அந்த ரத்த தானத்தை வாழ்வின் லட்சியமாகவே நிறைவேற்றி வருகிறார்கள் மதுரை வரதராஜன் – அமுதுரஜினி தம்பதி.  ஏழைக் குழந்தைகளின் சிகிச்சைக்கு, வரதராஜன் மட்டும் இதுவரை 72 முறை ரத்தம் வழங்கியுள்ளார்.
தனது துணைவியாரையும் ரத்தம் வழங்க வைத்து ஏழை நோயாளிகளின் உயிர் பிழைக்க உதவி வருகிறார். இத்தனைக்கும் வரதராஜனுக்கு “ஏ’ நெகட்டிவ் எனும் அரியவகை ரத்தம் இருப்பது குறிப்பிடத்தக்கது. அவரது சேவையைப் பாராட்டி, “நெஞ்சம் கலந்த நேயர்’ உள்ளிட்ட பல விருதுகளும் அளிக்கப்பட்டுள்ளன. ரத்த தானச் சேவையுடன் புரட்சிக் கவிஞர் மன்றத்தின் மூலம் மாதந்தோறும் இலக்கியக் கூட்டம் என இதுவரை ஆயிரக்கணக்கான நிகழ்ச்சிகளையும் நடத்திவரும் அந்தத் தம்பதியரை மதுரை மேலமாசி வீதியில் உள்ள மணியம்மை மழலையர் பள்ளியில் சந்தித்துப் பேசினோம்.
எப்போதிருந்து ரத்த தானம், இலக்கிய சேவையில் ஈடுபட்டு வருகிறீர்கள்?
மழலையர் பள்ளியைக் கடந்த 25 ஆண்டுகளாக நடத்திவருகிறேன். நான் சாதி மறுப்பு திருமணம் செய்தவன். சமூகச் சீர்திருத்தத்தை மனதில் வைத்து சுயமரியாதை இயக்கத்தில் ஈடுபட்டுவருகிறேன். எனினும், தமிழ் மொழிக்கும், அதன் இலக்கியத்துக்கும் அயராது பாடுபடவேண்டும் என மாதந்தோறும் இலக்கியக் கூட்டத்தையும் நடத்திவருகிறேன். தமிழண்ணல், இளங்குமரனார் என தமிழ் அறிஞர்கள் துணையோடு தமிழ் இலக்கியத்தை இளந்தலைமுறையினருக்கு கொண்டுசெல்வதே எனது கூட்டத்தின் நோக்கம்.
இதற்கிடையில்தான் ஏழை எளியோருக்கு ரத்த தானம் வழங்கிவருகிறேன். அதாவது அரசு மருத்துவமனையில் சிகிச்சை பெறும் ஏழை நோயாளிகளுக்கு மட்டும்தான் ரத்தம் வழங்குவது என்ற குறிக்கோளுடன் இதுவரை 72 முறை ரத்தம் வழங்கியுள்ளேன்.
எப்போது ரத்தம் வழங்க ஆரம்பித்தீர்கள்? உங்கள் துணைவியாரையும் இதில் ஈடுபடுத்தியது எப்படி?
கடந்த 15 ஆண்டுகளுக்கு முன் நான் எனது பிறந்த நாளுக்காக பிறருக்கு என்னால் ஆன உதவியைச் செய்ய நினைத்திருந்தேன். அப்போது அரசு மருத்துவமனையில் ஏழை குழந்தை சிகிச்சைக்கு அரியவகை ரத்தமான ஏ நெகட்டிவ் தேவைப்படுவதாக அறிந்து முதலில் வழங்கினேன். பின்னர், நோயாளிகளுக்குத் தேவைப்படும்போதெல்லாம் ரத்தம் வழங்கலாமே என நானும் துணைவியாரும் பேசினோம். அதனடிப்படையில்தான் பெரியார் குருதிக் கழகம் அமைத்து ஆண்டுக்கு சுமார் 600 பேரையாவது ரத்தம் வழங்க வைக்கிறோம்.
எங்களது ரத்த தானக் கழகம் மூலம் அரசு மருத்துவமனைக்கு மட்டுமே ரத்தம் வழங்கிவருகிறோம். ஆனால், சில நேரம் தவிர்க்கமுடியாத காரணங்களால் தனியார் மருத்துவமனைகளும் எங்களிடம் ரத்தம் கேட்பதால், நோயாளிகள் நலன் கருதி இலவசமாகவே அவர்களுக்கும் ரத்தம் வழங்குகிறோம்.
நாங்கள் காதல் திருமணம் செய்தவர்கள். எனது துணைவியார் அமுதுரஜினியும் அவ்வப்போது ரத்தம் வழங்கிவருகிறார். அதிக முறை ரத்தம் வழங்கியதற்காகவும், அதிகமானோரை ரத்தம் வழங்கச் செய்தமைக்காகவும் மதுரை மாவட்ட அளவில் சிறந்த ரத்த தான தொண்டருக்கான விருது எனக்கு வழங்கப்பட்டுள்ளது.
ரத்த தானம் தவிர வேறு என்ன சேவையில் ஈடுபடுகிறீர்கள்?
குழந்தைகளுக்கு ஹீமோகுளோபின் அளவு குறைந்தால் பல நோய்கள் வர வாய்ப்புள்ளது. ஆகவே குழந்தைகளுக்கான ஹீமோகுளோபின் அளவைக் கண்டறியும் மருத்துவ முகாம் ஆங்காங்கே நடத்தப்படுகிறது. அப்படி ஹீமோகுளோபின் குறைந்திருக்கும் குழந்தைகளுக்கு அதைச் சரிசெய்யும் மருந்து, மாத்திரைகளை வழங்கி வருகிறோம்.   நாங்கள் நடத்தும் மணியம்மை மழலையர் பள்ளியில் சிறுவர், சிறுமியருக்கு ஒழுக்கம், கட்டுப்பாடு ஆகியவற்றைக் கற்றுத் தருகிறோம். மூளை வளர்ச்சியற்ற குழந்தைகளுக்கு இலவசமாகவே கல்வி கற்றுத் தரப்படுகிறது.
எங்கள் பள்ளியில் படிக்கும் குழந்தைகள் திண்ணைப் பள்ளிக்கூட ஒழுக்கத்தையும், இருபத்தோராம் நூற்றாண்டு கல்வி அறிவையும் பெறும் வகையில்தான் கற்பிக்கப்படுகிறது. மேலும், இசை பயிற்சி முகாமையும் கோடை விடுமுறை நாள்களில் நடத்திவருகிறோம். அதில் ஏராளமான குழந்தைகள் கலந்து கொண்டு சான்றிதழைப் பெற்றுவருகிறார்கள்.
நீங்கள் பெரியார் கொள்கையில் தீவிர ஈடுபாடு உடையவராக இருந்தும் பக்தி இலக்கியக் கூட்டங்களை அதிகம் நடத்துகிறீர்களே?
தமிழ் இலக்கியத்தில் பக்தி இலக்கியங்கள் முக்கியமானவை. நாட்டில் மனச்சாட்சியும், நம்பிக்கையும் முக்கியம். அப்படிப் பார்த்தால் எங்கள் ஊர் கோயில் நகைகளை எனது பொறுப்பில் வைப்பதைத்தான் எங்கள் பகுதி மக்கள் விரும்புகிறார்கள். பெரியார் பிறந்த தினத்துக்குக்கூட நான் பெரியபுராண வரிகளை வைத்தே வாழ்த்தி போஸ்டர் ஒட்டுகிறேன். தமிழ் மொழிக்கும், தமிழ் இலக்கியத்துக்கும் இளந்தலைமுறையினரின் பங்கு மிகவும் குறைந்துவருகிறது. அதற்காகவே மாதந்தோறும் இலக்கியக் கூட்டத்தையும் நடத்திவருகிறேன்.
கட்டுப்பாடு, ஒழுக்கம், மனிதநேய அதனடிப்படையில் கற்பிக்கப்படும் கல்வியே சமூகத்துக்கு நன்மை பயக்கும். இதை மையமாக வைத்தே ரத்த தானம், கல்வி நிலையம், இலக்கியக் கூட்டங்களை துணைவியாரோடு சேர்ந்து நடத்திவருகிறேன். இன்னும் சொல்லப்போனால் மக்கள் சேவைக்கு, இல்லறத்தால் இடையூறு ஏற்படக்கூடாது என்ற நோக்கில், குழந்தைகூட பெற்றுக் கொள்ளாமலேயே நானும் எனது துணைவியாரும் பொதுப்பணியில் ஈடுபட்டுவருகிறோம்.

87 வயது முதியவர் மீண்டும் முதல்வராக வேண்டுமா? – ராகுல்காந்தி

87 வயதாகிவிட்டவர் மீண்டும் முதல்வராக வேண்டுமா? என்று மக்கள் யோசிக்க வேண்டும். இளைஞர்களுக்கு அதிக வாய்ப்பு தந்துள்ள காங்கிரசை ஆதரிக்க வேண்டுமென ராகுல் காந்தி பிரச்சாரம் மேற்கொண்டுள்ளார்.
கேரளத்திலும் தமிழகத்தைப் போல வரும் 13-ம் தேதி வாக்குப் பதிவு நடைபெறவுள்ளது.
கேரள மாநில சட்டப் பேரவைத் தேர்தலை முன்னிட்டு காங்கிரஸ் தலைமையிலான ஐக்கிய ஜனநாயக முன்னணிக்கு ஆதரவாக ராகுல்காந்தி, தீவிர பிரச்சாரம் மேற்கொண்டுள்ளார்.
கொச்சியில் பிரச்சாரம் மேற்கொண்ட அவர் பேசும்போது,   ‘’சட்டப் பேரவைத் தேர்தலில் இடதுசாரி ஜனநாயக முன்னணி வென்றால், அடுத்த தேர்தலின் போது 93 வயதாகும் முதியவர் (வி.எஸ். அச்சுதானந்தன்) உங்கள் முதல்வராக இருப்பார். இந்த நிலைமை உங்களுக்கு வேண்டுமா?
காங்கிரஸுக்கு வாக்களித்தால், இளைஞர்களும், அதே நேரத்தில் அரசியலில் அனுபவம் மிக்கவர்களும் சமஅளவில் சட்டப் பேரவைக்குச் செல்வர். இளமைக்கு உரிய துடிப்புடனும், அனுவத்துக்கு ஏற்ற விவேகத்துடனும் ஆட்சி நடைபெறும்.
கேரள அரசியலில் இப்போது வன்முறை அதிகரித்து விட்டது. ஆட்சி மாற்றத்துக்குப் பின் இதற்கு முடிவு கட்டப்படும். கம்யூனிஸ்ட்களின் ஆட்சியில்தான் வன்முறை அதிகரித்துள்ளது.
காந்திய வழியில் வந்த காங்கிரசார் எப்போதும் அமைதியை விரும்புபவர்கள். எனவே காங்கிரஸ் தலைமையிலான கூட்டணி ஆட்சிக்கு வர மக்கள் வாக்களிக்க வேண்டும்’’என்று ராகுல் காந்தி பேசினார்.

Friday, April 8, 2011

ஸ்ரீ.ல.சு.கட்சி மாநாட்டில் இந்திய காங்கிரஸ் கட்சி உறுப்பினர்கள்

கொழும்பில் ஜனாதிபதி மஹிந்த ராஜபக்ஷ தலைமையில் நேற்று நடைபெற்ற ஸ்ரீ லங்கா சுதந்திரக் கட்சியின் மாநாட்டில் பங்குகொள்ளும் வகையில் காங்கிரஸ் தலைவி சோனியா காந்தி தனது கட்சிப் பிரமுகர்களை அனுப்பி வைத்திருந்தார் என இந்திய ஊடகமொன்று செய்தி வெளியிட்டுள்ளது.
அதன் விபரம் வருமாறு:
காங்கிரஸ் கட்சியின் சார்பில் முன்னாள் பிரதமர் லால்பகதூர் சாஸ்திரியின் மகன் அனில் சாஸ்திரியும், ஜார்க்கண்ட் மாநிலத்தில் இருந்து ராஜ்யசபாவுக்கு தேர்ந்தெடுக்கப்பட்ட மேபல் ரிபரோவும் அனுப்பி வைக்கப்பட்டுள்ளனர். இலங்கை சுதந்திரக் கட்சியின் 19ஆவது மாநாடு, கொழும்பில் நேற்று ஆரம்பமானது. காங்கிரஸ் கட்சி முதல் முறையாக தனது கட்சித் தலைவர்களை இம்மாநாட்டுக்கு அனுப்பி வைத்துள்ளது குறிப்பிடத்தக்கது.
விடுதலைப் புலிகளை வீழ்த்தியதற்காக இலங்கை ஜனாதிபதிக்குத் தங்களுடைய பாராட்டுக்களைக் கட்சிப் பிரதிநிதிகள் தெரிவிப்பர் என அக்கட்சி வட்டாரங்கள் தெரிவிக்கின்றன.
முதலில் ஆந்திர மாநிலத்தைச் சேர்ந்த கிஷோர் சந்திர தேவ் மற்றும் ஜெயந்தி நடராஜனை தனது கட்சி பிரதிநிதிகளாக அனுப்பி வைக்க காங்கிரஸ் கட்சி திட்டமிட்டு இருந்தது.
காங்கிரஸ் கட்சியின் வெளிவிவகாரத் துறை அமைச்சர் கரம்சிங், முதலில் கிஷோர்சந்திர தேவை தொடர்பு கொண்டு, கட்சியின் முடிவை தெரிவித்திருந்தார். கிஷோர்சந்திர தேவ் தாம்பரம் கிறிஸ்தவக் கல்லூரியிலும், அதன் உயர்நிலைப் பள்ளியிலும் படித்தவர். தமிழ் சரளமாக பேசக் கூடியவர். அதனால் அவரை இலங்கைக்கு அனுப்பி வைக்க கட்சி தீர்மானித்தது.
ஆனால் அவர்,
“இப்போதுள்ள சூழ்நிலையில் இலங்கைக்குத் தான் செல்ல இயலாது”எனக் கட்சித் தலைமைக்கு தெரிவித்து விட்டதாக அந்த வட்டாரங்கள் தெரிவிக்கின்றன.
இந்நிலையில், இலங்கை அகதிகள் முகாம்களில் உள்ள தமிழர்களை அவரவர் வாழ்விடங்களில் குடியமர்த்துவது, நிவாரணப் பணிகள் மேற்கொள்வது உள்ளிட்ட பிரச்னைகள் குறித்து பேச்சுவார்த்தை நடத்த, பிரதமர் மன்மோகன் சிங்கின் சிறப்பு தூதராக, நேற்று முன்தினம் காலை நிதியமைச்சர் பிரணாப் முகர்ஜி இலங்கைக்கு சென்றிருந்தார்.
இலங்கையின் முன்னாள் வெளியுறவுத்துறை அமைச்சர் லஷ்மண் கதிர்காமர் நினைவு சொற்பொழிவில் அவர் கலந்து கொண்டார்.
பின் இலங்கை வெளியுறவுத்துறை அமைச்சர் ரோகித பொகொல்லகமவை, பிரணாப் முகர்ஜி சந்தித்துப் பேச்சு வார்த்தை நடத்தினார்.

Thursday, April 7, 2011

அதிமுக வேட்பாளருக்கு ஓட்டு கேட்ட வடிவேலு : திமுகவினர் ஆவேசம்

நத்தம் கோபால்பட்டியில் அ.தி.மு.க., வேட்பாளருக்கு ஓட்டு கேட்ட நடிகர் வடிவேலுவால் பரபரப்பு ஏற்பட்டது. திண்டுக்கல் மாவட்டம் நத்தம் தொகுதியில் தி.மு.க., வேட்பாளர் க.விஜயனை ஆதரித்து, நடிகர் வடிவேலு பிரச்சாரம் செய்தார்.
அப்போது வடிவேலு பேசும்போது,   ‘’தி.மு.க.,வை ஆதரித்தால் உங்கள் இல்லங்களில் விளக்கு எரிந்து சுபிட்சம் உண்டாகும்.
எதிரணியினர் பேச்சை கேட்டு நன்றி மறந்தவர்களாக இருக்க வேண்டாம். எனவே, உங்கள் ஓட்டை விசுவநாதனுக்கு (அ.தி.மு.க., வேட்பாளர்) போடுங்கள்’’ என்றார்.
வடிவேலுவின் இந்த பேச்சால் பரபரப்பு ஏற்பட்டது.   திமுகவினர் ஆவேசமடைந்து  சப்தம் போட்டதால், சுதாரித்துக்கொண்ட வடிவேலு,க.விஜயனுக்கு ஓட்டுப் போடுங்கள் என மாற்றி கூறினார்.
வடிவேலுவின் பேச்சால் கூட்டத்திற்கு வந்த திமுக தொண்டர்கள் குழப்பமடைந்தனர்.

Wednesday, April 6, 2011

ஒரு கொலைகாரனுக்கு திரும்பத் திரும்ப சிவப்புக் கம்பள வரவேற்பு ஏன்?

இங்குள்ள தமிழரை இந்தியராக இந்த நாடு மதிக்கவே இல்லை என்பதை மீண்டும் நிரூபித்துள்ளது சோனியா காந்தி – மன்மோன் சிங்கின் மத்திய அரசு!
இலங்கையில் நடந்த தமிழின அழிப்பைப் பார்த்து உலகமே ராஜபக்சேவை கொலைகாரன் என்றும், இனப் படுகொலைக்குக் காரணமானவன் என்றும், போர்க்குற்றவாளி என்றும் முத்திரைக் குத்தி வரும் நேரத்தில், அந்தக் கொலைகாரனை தாங்கிப் பிடித்து, சம அந்தஸ்து வழங்குவதில் மும்முரம் காட்டுகிறது மத்திய அரசு.
இந்தியாவில் எந்த விசேஷமாக இருந்தாலும் முதல் அழைப்பு போவது, தமிழர் பிணங்களின் மீது நின்று எக்காளமிட்ட இந்த கொலைகாரனுக்குத்தான். இங்குள்ள தலைவர்களோ இன உணர்வாளர்களோ எழுப்பும் கூக்குரலை ஒரு பொருட்டாகக் கூட மதிப்பதில்லை மன்மோகன் அரசு.
ராஜபக்சேவும் இந்திய அரசின் மனநிலையைப் புரிந்து கொண்டு, முடிந்தவரை தமிழரையும் தமிழர் தலைவர்களையும் அசிங்கப்படுத்துவதில் குறியாக உள்ளதைப் புரிந்து கொள்ள முடிகிறது.
தமிழீழ விடுதலைப் புலிகளின் தேசியத் தலைவர் பிரபாகரனின் அன்னை பார்வதி அம்மாளுக்கு இறுதி அஞ்சலி செலுத்த இலங்கை சென்னை இந்திய பாராளுமன்றத்தின் உறுப்பினரும் ஒரு பெரிய கட்சியின் தலைவருமான திருமாவளவனை (அவர் மீது ஆயிரம் குற்றச்சாட்டுகளை நாம் வைத்தாலும் கூட) கொழும்பு விமான நிலையத்தில் கால்வைக்கக் கூட அனுமதிக்காமல் அவமதித்துத் திருப்பி அனுப்பிய இனவெறியனான ராஜபக்சேவை, அடுத்த ஒரே மாதத்தில் ரத்தினக் கம்பள வரவேற்பு கொடுக்க அழைக்கிறது மத்திய அரசு. அதுவும் ஏதோ தலைபோகிற அரசியல் காரியத்துக்கல்ல… வர்த்தக ஒப்பந்தப் பேச்சுக்கல்ல… ஏற்கெனவே வெற்றி தோல்வி நிச்சயக்கப்பட்ட ஒரு கிரிக்கெட் ஆட்டத்தைக் கண்டு களிக்க.. விவஸ்தை கெட்ட ஜென்மங்கள்!
அவனும் வெட்கமே இல்லாமல் இந்தியாவுக்கு வந்து, சென்னையில் இறங்கி அங்கிருந்து திருப்பதிக்கு மகா பாதுகாப்புடன் போய், வெங்கடாஜலபதியிடம் ‘இலங்கை ஜெயிக்க வேண்டும்; இந்திய அணி தோற்க வேண்டும்’ என்று பிரார்த்தனை செய்து கொண்டு… அடப்பாவிகளா, என்னதான் நடக்கிறது இந்த நாட்டில்?
சென்னையில் கொலை, கொள்ளை, ஆள்கடத்தல் என அத்தனை கிரிமினல் வேலைகளையும் செய்த, தேடப்படும் குற்றவாளியாக இந்திய நீதிமன்றத்தால் அறிவிக்கப்பட்ட டக்ளஸ் தேவானந்தா என்ற கிரிமினல், சகல பாதுகாப்பு மரியாதைகளுடன் இந்திய பிரதமர் வீட்டில் அவருடன் விருந்துண்டு மகிழ்கிறான்; பல்லாயிரம் தமிழர்களைக் கொன்ற, உலகத்தால் கொலைகாரன் என்று முத்திரை குத்தப்பட்ட ராஜபக்சே, முதல் மரியாதைக்குரியவனாக தமிழகத்திலும் இந்தியாவிலும் நடமாடுகிறான்… ஆனால், இந்த மண்ணின் மைந்தர்கள், இழந்த தம் உறவுகளுக்காக மனம் வெதும்பி குரல் கொடுத்தால் சிறைவாசமா?
என்ன சாதிக்க நினைக்கிறது இந்தியா?
‘எங்கள் ஆதரவுடன் நடந்த தமிழர் அழிப்பு நடவடிக்கையைச் செய்து முடித்த ராஜபக்சேவை யாரும் இனி போர்க்குற்றவாளி என்று சொல்லக் கூடாது. இந்தியாவின் சமமான நண்பன், தமிழர் இன அழிப்பு என்பது இந்தியாவின் அறிவிக்கப்படாத வெளியுறவுக் கொள்கைகளில் ஒன்று’, என்றா?
ஒரு சினிமா விழாவுக்கு தடையை மீறிப் போன நடிகையை புறக்கணிப்போம் என்று சொல்லும் ரோசக்காரர்களே… யோசித்துப் பாருங்கள்… அதே இலங்கையின் ராஜபக்சேவை இங்கழைத்து கூடிக் குலவுகிறது காங்கிரஸ் தலைமையிலான மத்திய அரசு. இவர்களை என்ன செய்யலாம்… எப்படி தண்டிக்கப் போகிறோம்?
ராஜபக்சே இந்தியாவுக்கு வந்தால் தமிழர் எதிர்ப்பு தெரிவிப்பார்கள் என்று தெரிந்தும், வெட்டுக்காயத்தில் உப்பை வைத்துத் தேய்த்துத் திருப்திப்படும் குரூர புத்தி கொண்ட காங்கிரஸ் ஆட்சியாளர்களை ஓட ஓடத் துரத்த முன்பு வாய்த்த சந்தர்ப்பத்தைத்தான் தெரிந்தே நழுவ விட்டோம். இந்த முறை, மீண்டும் ஒரு சிறிய வாய்ப்புக் கிடைத்துள்ளது.
தமிழ் மண்ணில் காங்கிரஸ் என்ற கட்சி முன்பு இருந்தது என்று சொல்லும் நிலையை இந்தத் தேர்தலில் ஏற்படுத்துவதுதான், இந்த அவமானங்களிலிருந்து தமிழர்கள் கொஞ்சமாவது தலைநிமிர வழி! அடுத்த முறை கொலைகாரன் ராஜபக்சேவை இந்தியாவுக்கு அழைக்கும் முன் தமிழர்கள் மனநிலை என்ன என்றாவது மத்திய ஆட்சியாளர்கள் யோசிக்க இந்த ஆயுதம் சற்றேனும் உதவக்கூடும்!
குறிப்பு: இலங்கையில் உள்ள தமிழ் கட்சிகளின் தலைவர்கள் எந்த அளவுக்கு ராஜபக்சேவுடன் இணக்கமாக உள்ளனர், கூடிக் குலாவி விருந்துண்ணுகின்றனர், தமிழர் பகுதிகளில் ராஜபக்சே அரசியல் வெற்றிகள் பெற உதவுகின்றனர்…  இங்குள்ளவர்கள் எதிர்த்து என்ன பயன் என்ற கேள்விகளை சிலர் எழுப்பலாம்.
தலைவர்கள் எல்லாம் தமிழர் ஆகிவிட முடியாது. டக்ளஸ்கள், கருணாக்கள் வழியில் இன்னும் எக்கச்சக்கமாய் பிழைப்புவாதிகள் அங்கே உருவாகியிருக்கலாம். ஆனால் ராணுவத்திடம் சின்னா பின்னமாகி சிதைந்த தமிழ்ச் சொந்தங்கள் நம்பியது இங்குள்ள தமிழ் உறவுகளைத்தான். அந்த உணர்வுக்கு தரும் மரியாதை, தமிழர் இன அழிப்புக்கு துணை நின்ற காங்கிரஸை புறக்கணிப்பது… ஆம்… காங்கிரஸை மட்டும். தமிழர் அரசியலில் இனி காங்கிரசுக்கு இடமில்லை என்ற நிலைதான் முக்கியம்!  எனவே நம் உறவுகளுக்கு நாம் செய்ய வேண்டிய கடமையைச் செய்வோம்!

லண்டன் வன்முறைச் சம்பவம்!- மக்களை விழிப்பாக இருக்குமாறு தகவல்துறை அமைச்சகம் வேண்டுகோள்

புலம்பெயர் நாடுளில் தமிழர்கள் மத்தியில் இடம்பெற்றுவருகின்ற வன்முறைச் சம்பவங்களை, தமிழர்களின் விடுதலைப் போராட்டத்தை பலவீனப்படுத்துகின்ற ஓர் ஆயுதமாக பயன்படுத்துகின்ற சிறிலங்கா அரசின் பிரசாரங்களுக்கு, வலுவூட்டுகின்ற வகையில் தமிழர்களின் செயற்பாடுகள் அமையக்கூடாதென....
நாடுகடந்த தமிழீழ அரசாங்கத்தின் தகவல்துறை துணை அமைச்சர் சுதர்சன் சிவகுருநாதன் நாதம் ஊடக சேவையூடாக தெரிவித்துள்ளார்.
விடுதலைக்கான செயற்பாட்டுத் தளத்தில், லண்டனில் நீண்டகாலமாக இயங்கி வந்துள்ள திரு.தனம் என அழைக்கப்படும் சூசைப்பிள்ளை மீது நடாத்தப்பட்ட வன்முறைச் சம்பவம் குறித்து நாதம் ஊடக சேவைக்கு கருத்துரைத்த பொழுதே இதனை தெரிவித்துள்ளார்.
கருத்து முரண்பாடுகள் இத்தகைய வன்முறைகளாக தோற்றம் பெறுவது, ஓரு ஆரோக்கியமான விடுதலைப் பண்பாடாக அமையாதென தெரிவித்துள்ளதோடு, இச்சம்பவத்தை நாடுகடந்த தமிழீழ அரசாங்கத்தின் மீது திட்டமிட்டு திசை திருப்பிவிடும் சில ஊடகங்களின் செயற்பாடுகளையும்; வன்மையாக கண்டித்துள்ளார்.
இதேவேளை இத்தகைய திசைதிருப்பும் செய்திகள் தொடர்பில் குறித்த ஊடகத்தரப்பினருக்கு தனது கண்டனத்தை தெரியப்படுத்த இருப்பதாகவும் தனக்கு ஏற்பட்ட சம்பவத்தை நாடுகடந்த தமிழீழ அரசாங்கத்தை நோக்கி திசை திருப்பி விடுகின்றமை கவலையளிப்பதாகவும் திரு.தனம் அவர்கள் நேரடியாகவே தகவல்துறை துணை அமைச்சர் சுதர்சன் சிவகுருநாதன் அவர்களுக்கு தெரிவித்துள்ளார்.
சம்பவம் குறித்து காவல்துறையினர் விசாரணைகளை மேற்கொண்டுவரும் நிலையில் அவசரகதியில் இவ்வாறு திசைதிருப்பும் செய்திகளை பரப்பிவரும் விசமிகள் குறித்து மக்கள் விழிப்பாக இருக்குமாறு தகவல்துறை அமைச்சகம் வேண்டுகோள் விடுத்துள்ளது.
நாதம் ஊடக சேவை
நாடுகடந்த தமிழீழ அரசாங்கம்

இராமேஸ்வர மீனவர்கள் 4 பேரை காணவில்லை! இலங்கை கடற்படை மீது சந்தேகம்- வைகோ

இராமேஸ்வர மீனவர்கள் 4 பேர் காணாமல் போயுள்ளதாகவும், இலங்கைக் கடற்படையினர்தான், அந்தப் படகை கடத்திச் சென்று இருக்க வேண்டும் என இராமேசுவரம் மீனவர்கள் கருதுகிறார்கள் என்றும் மதிமுக தலைவர் வைகோ கூறியுள்ளார்.
காணாமல் போயுள்ள, 4 மீனவர்களையும் மீட்குமாறு கோரி வைகோ, மத்திய வெளியுறவுத் துறை அமைச்சர் எஸ்.எம். கிருஷ்ணாவுக்கு மத்திய அரசுக்கு கடிதம் எழுதியுள்ளார்.
வைகோ எழுதியுள்ள கடிதித்தில்,
இராமேசுவரத்தைச் சேர்ந்த அந்தோனி என்பவருக்குச் சொந்தமான மீன்பிடிப் படகில் விக்டஸ், அந்தோனி, ஜான் பால், மாரிமுத்து ஆகிய நான்கு மீனவர்கள் கடந்த 2 ம் தேதி அதிகாலையில் மீன்பிடிக்கச் சென்றனர்.
ஒரு நாள் பயணத்துக்கு மட்டுமே அவர்களிடம் பெற்றோல் இருந்துள்ளது. எனவே, மறுநாள் 3 ம் தேதி அதிகாலைக்கு உள்ளாக அவர்கள் திரும்பி வந்திருக்க வேண்டும். ஆனால், இரண்டு நாட்கள் ஆகியும் அவர்கள் திரும்பி வரவில்லை. அந்தப் பகுதி மீனவர்கள் கடலில் சென்று தேடியபோது, அவர்கள் சென்ற படகையும் காணவில்லை.
அந்தப் பகுதியில் இலங்கை கடற்படையினரின் நடமாட்டத்தை இதர மீனவர்கள் பார்த்துள்ளனர்.
எனவே, இலங்கைக் கடற்படையினர்தான், அந்தப் படகை கடத்திச் சென்று இருக்க வேண்டும் என இராமேசுவரம் மீனவர்கள் கருதுகிறார்கள்.
கடத்திச் செல்லப்பட்ட மீனவர்களின் உயிருக்கும், உடமைக்கும் எவ்வித ஆபத்தும் இன்றி அவர்களைப் பாதுகாப்பாக மீட்பதற்கு உடனடியாக நடவடிக்கை எடுக்க வேண்டும் என தனது கடிதத்தில் வைகோ கேட்டுக் கொண்டுள்ளார்.

Tuesday, April 5, 2011

நடிகர் வடிவேலு பிரச்சாரத்தில் மீண்டும் கல்வீச்சு

நடிகர் வடிவேலு தமிழ்நாடு முழுவதும் தீவிர சுற்றுப்பயணம் செய்து தி.மு.க. கூட்டணிக்கு ஆதரவு திரட்டி வருகிறார். நேற்று முன்தினம் அவர் ராமநாதபுரம் மாவட்டம் கமுதியில் பேசிய போது அவரது பிரசார வாகனத்தின் மீது கல்வீசினார்கள்.
இதே போன்று நேற்று அவர் மதுரை மாவட்டத்தில் பிரச்சாரத்தில் ஈடுபட்டு இருந்த போது அலங்காநல்லூரிலும் அவர் வேன் மீது கல்வீசப்பட்டது.
நேற்று மாலை வாடிப்பட்டியில் பிரசாரத்தை முடித்துவிட்டு அவர் அலங்காநல்லூருக்கு வந்து கொண்டிருந்தார். ஊருக்குள் நுழையும் இடத்தில் யாரோ மர்ம கும்பல் அவரது வேன் மீது சரமாரியாக கற்களை வீசியது. இதில் வேனின் கண்ணாடி உடைந்து சேதம் அடைந்தது. ஆனால் வேனில் பயணம் செய்த வடிவேலு உள்பட யாருக்கும் காயம் ஏற்படவில்லை.
இதைத்தொடர்ந்து அவர் அலங்காநல்லூர் பஸ் நிலையம் அருகே வேனில் நின்றபடி, பா.ம.க. வேட்பாளர் இளஞ்செழியனுக்கு ஆதரவு திரட்டி அவர் பேசும்போது,
நான் ஊருக்குள் வரும்போது, யாரோ மர்ம நபர்கள் இருட்டுக்குள் இருந்து என் வேன் மீது கற்களை வீசிவிட்டு தப்பிவிட்டனர்.
தைரியம் இருந்தால் கற்களை வீசியவர்கள் வெளிச்சத்தில் வந்து மோதிக்கொள்ள தயாரா? தி.மு.க.வின் பல்வேறு நலத்திட்டங்கள் முதலமைச்சர் கருணாநிதியை மீண்டும் 6வது முறையாக முதலமைச்சராக்கும் என்ற நம்பிக்கை இருக்கிறது. மக்கள் அனைவரும் தி.மு.க. கூட்டணி கட்சி வேட்பாளர்களுக்கு ஓட்டு போடவேண்டும் என்று  பேசினார்.
இதைத்தொடர்ந்து ஊமச்சிகுளம் பகுதியில் அவர் பிரசாரம் செய்தார்.
இதனிடையே நடிகர் வடிவேலு வேன் மீது கல்வீசப்பட்ட தகவல் குறித்து போலீஸ் சூப்பிரண்டு ஆஸ்ராகார்க்குக்கு தகவல் தெரிவிக்கப்பட்டது. உடனடியாக அவர் போலீசாருடன் சம்பவ இடத்துக்கு சென்று பார்வையிட்டு விசாரணை நடத்தினார். இதில் சம்பந்தப்பட்ட குற்றவாளிகளை பிடித்து கைது செய்ய போலீசாருக்கு உத்தரவிட்டார்.

காங்கிரசை தண்டிக்க வேண்டும்: பழ. நெடுமாறன்

ஈழத் தமிழர் படுகொலைக்கு துணை நின்ற காங்கிரசை இந்த தேர்தலில் மக்கள் தண்டிக்க வேண்டும் என்று பழ. நெடுமாறன் கூறியுள்ளார்.
இதுகுறித்து அவர் வெளியிட்டுள்ள அறிக்கையில் கூறியிருப்பதாவது, மதுவின் மயக்கத்தில் மக்களை ஆழ்த்தியும் இலவசங்கள் மூலம் மக்களை ஏமாற்றவும் முயற்சி நடைபெறுகிறது. பணத்தை வைத்துப் பதவி, பதவியை வைத்துப் பணம் என்ற நச்சுச் சுழற்சியில் சிக்கித் தவிக்கும் தமிழகத்தை விடுவிக்க வேண்டிய பொறுப்பு வாக்காளர்களுக்கு உண்டு.
சந்தர்ப்பவாத அரசியல் பலிபீடத்தில் கிடத்தப்பட்டுக் கிடக்கும் ஜனநாயகத்தை மீட்காவிட்டால் ஜனநாயகம் சாகடிக்கப்பட்டு பணநாயகம் அரியணை ஏறிவிடும். இந்த நூற்றாண்டில் நிகழ்ந்த மிகப் பெரிய இனப்படுகொலையான ஈழத்தமிழர் படுகொலைக்குக் காரணமான காங்கிரஸ் கட்சியை தண்டியுங்கள்.
ஈழத் தமிழர்களுக்காகவும், தமிழக மீனவர்களுக்காகவும், காவிரி, முல்லைப் பெரியாறு, சேதுக் கால்வாய் போன்ற தமிழகத்தின் தலையாய பிரச்சினைகளுக்காகவும், தமிழக இயற்கை வளங்களைச் சுரண்டுவதற்கு எதிராகவும் குரல் கொடுக்கும் கட்சிகளைச் சேர்ந்த வேட்பாளர்களையும் தமிழ்த்தேசிய உணர்வுள்ள வேட்பாளர்களையும் ஆதரித்து வெற்றி பெறவைக்க வேண்டுகிறேன்.
ஊழலற்ற, நேர்மையான, நீதியான ஆட்சியைத் தரவல்லவர்கள் யார் என்பதைத் தேர்ந்து தெளிந்து வாக்களித்து ஜனநாயகக் கடமையை நிறைவேற்றுமாறு வாக்காளப் பெருமக்களை வேண்டிக் கொள்கிறேன். இவ்வாறு நெடுமாறன் தனது அறிக்கையில் தெரிவித்துள்ளார்.

சீமான் பிரசாரத்தால் கவலைப்படவில்லை: காங்கிரஸ்

தங்களுக்கு எதிரான நாம் தமிழர் கட்சித் தலைவர் சீமானின் பிரசாரத்தால் கவலைப்படவில்லை என்று தமிழக காங்கிரஸ் தலைவர் தங்கபாலு தெரிவித்தார்.
சென்னையில் நிருபர்களிடம் அவர் கூறுகையில், “ராகுல் காந்தி ஒவ்வொரு முறையும் தமிழகத்திற்கு வரும்போது முதல்வர் கருணாநிதியை சந்திக்கவில்லை என்று கூறுகிறீர்கள். அவர் சென்னையில் நடந்த செய்தியாளர்கள் சந்திப்பின்போது இதுபற்றி கூறியிருக்கிறார்.
முதல்வர் கருணாநிதி ஒரு மூத்த தலைவர். அவர் மீது தனக்கு மிகுந்த அன்பு இருப்பதாக அவரே தெரிவித்திருக்கிறார். மூத்த தலைவர்கள் மீது ராகுல் காந்திக்கு எப்போதும் மிகுந்த மரியாதையும், அன்பும் உள்ளது.
தமிழகத்தில் வெளியாகியுள்ள கருத்துக் கணிப்புகள் அனைத்தும் போலியானவை. மக்களை ஏமாற்றும் நயவஞ்சகத்தனத்தின் ஒரு பகுதியே அது. கடந்த 2009ம் ஆண்டு இதேபோல ஒரு கருத்துக்கணிப்பு வெளியிடப்பட்டது. ஆனால் எங்கள் கூட்டணிதான் அதிக இடங்களில் வெற்றி பெற்று அந்த கருத்துக்கணிப்பை பொய்யாக்கியது. அதேபோல இந்த முறையும் ஜனநாயக முற்போக்கு கூட்டணிதான் வெல்லும்.
மேலும், அந்தக் கருத்துக்கணிப்பில் அரசியல் சாதனைகளை கூறவில்லை என்று தெரிவிக்கப்பட்டுள்ளது. தேர்தலின் மையக் கருத்தே மத்திய, மாநில அரசுகளே எண்ணற்ற சாதனைகள்தான். எனவே அந்த சாதனைகளை மக்கள் மறக்காமல் இந்த கூட்டணியை வெற்றி பெறச் செய்வார்கள்.
சோனியா காந்தி அறிவித்த வேட்பாளர்களை எதிர்த்து யார் போட்டியிட்டாலும் அவர்கள் உண்மையான காங்கிரஸ்காரர்களாக இருக்க மாட்டார்கள். எனவேதான் அவர்கள் நீக்கப்பட்டுள்ளார்கள். அவர்களை நீக்க எனக்கு அதிகாரம் இல்லை என்று யாரும் சொல்ல முடியாது.
கடந்த நாடாளுமன்ற தேர்தலின் போதும் சீமான் எங்கள் கூட்டணியை எதிர்த்து பிரசாரம் மேற்கொண்டார். அதையும் மீறி நாங்கள் வெற்றிபெற்றோம். எங்களுக்கு கூட்டணி பலம் உள்ளது. எனவே இந்தப் பிரச்சாரத்தை பற்றி நாங்கள் கவலைப்படவில்லை.
தேர்தல் ஆணையம் நியாயமாகவும், பாரபட்சமின்றி நடந்து கொள்ளவேண்டும்.மத்திய அமைச்சர் மு.க.அழகிரி மீது வழக்குப் பதிவு செய்திருப்பதை கண்டிக்கிறேன்.
நடிகர் சிரஞ்சீவி காங்கிரஸ் கூட்டணி வேட்பாளர்களை ஆதரித்து பிரச்சாரம் செய்யவிருக்கிறார். அதற்கான தேதி பின்னர் அறிவிக்கப்படும்,” என்றார் தங்கபாலு.

Monday, April 4, 2011

உலகக்கிண்ண தோல்வியின் எதிரொலி! லண்டனிலும் தமிழர்கள் மீது சிங்களவர் தாக்குதல் முயற்சி

இலங்கை உலகக் கிண்ணத்தில் தோல்வியடைந்ததை லண்டனில் பல இடங்களில் தமிழர்கள் கொண்டாடியுள்ளனர். இதன் காரணமாக ஆத்தரமடைந்த மதுபோதையில் இருந்த பல சிங்களவர்கள் தமிழர்கள் மீது  தாக்குதல் நடாத்த  முற்பட்டதாக  தெரிவிக்கப்பட்டுள்ளது.
இலங்கைக்கும் இந்தியாவுக்கும் இடையே நேற்று இந்தியா, மும்பையில் நடைபெற்ற இறுதிப் போட்டியில் இலங்கை தோல்வியடைந்ததை லண்டன் தமிழ் இளைஞர்கள் கொண்டாடியுள்ளனர்.
ஈஸ்ட்காம் நகரில் பல சிங்களவர்கள் தாம் தான் இப் போட்டியில் வெல்வோம் என இலங்கைக் கொடியோடு மது அருந்தியவண்ணம் இருந்தனர். ஆனால் அவர்கள் எதிர்பார்ப்பு ஏமாற்றமானதால்  ஆத்தரமடைந்துள்ளனர்.
அந்த நேரத்தில், இந்தியா இலங்கையை வென்றது என்ற செய்திகள் வெளியாகிய மறுகணமே தமிழர்கள் புலிக்கொடிகளோடு சென்று தமது ஆதங்கங்களை வெளிப்படுத்தி உள்ளனர்.
லண்டனில் பல இடங்களில் இலங்கை உலகக் கிண்ணத்தில் தோல்வியடைந்ததை தமிழர்கள் கொண்டாடியுள்ளனர்.
இலங்கை தோல்வியடைந்ததை முன்னிட்டு மதுபோதையில் இருந்த பல சிங்களவர்கள் தமிழர்களைத் தாக்க முயற்சித்த போதிலும், தமிழ் இளைஞர்கள் பெருமளவில் இருந்ததால் அவர்கள் திரும்பிச் சென்றனர்.

இந்தியாவில் ஜனாதிபதி மஹிந்த அவமானப்படுத்தப்பட்டாரா?

உலகக்கிண்ண கிரிக்கட் இறுதிப் போட்டியைப் பார்வையிடச் சென்றிருந்த ஜனாதிபதி மஹிந்த ராஜபக்ஷ இந்தியாவில் அவமானப்படுத்தப்பட்டதாக சிங்கள ஊடகங்கள் செய்தி வெளியிட்டுள்ளன.
உலகக்கிண்ண கிரிக்கட்டின் இறுதிப்போட்டியைக் கண்டுகளிக்கச்சென்றிருந்த ஜனாதிபதி மஹிந்தவுக்கு குறைந்த பட்சம் இராஜதந்திர மரியாதை கூட வழங்கப்படவில்லை. அத்துடன் அவரை வரவேற்க விமானநி்லையத்துக்கு எந்தவொரு முக்கியஸ்தரும் வருகை தரவுமில்லை.
ஆனால் ஜனாதிபதி புறப்பட முன்னர் அவரை வரவேற்க இந்திய ஜனாதிபதி பிரதீபா பட்டேல் விமான நிலையத்துக்கு வருகை தருவார் என்று ஜனாதிபதி ஊடகப் பிரிவு இலங்கையின் சகல ஊடகங்களுக்கும் அறிவித்திருந்தது.
அத்துடன் விளையாட்டரங்கில் வைத்து இந்தியப் பிரதமர் மன்மோகன் சிங்கினால் இந்தியக் கிரிக்கட் வீரர்கள் ஜனாதிபதிக்கு அறிமுகம் செய்து வைக்கப்படுவார்கள் என்றும் அந்தச் செய்திக் குறிப்பில் குறிப்பிடப்பட்டிருந்தது.
ஆனாலும் அப்படி எதுவும் நடக்காதது மாத்திரமன்றி, ஜனாதிபதியுடன் அமர்ந்து கிரிக்கட் போட்டிகளை பார்வையிட இந்தியப் பிரதமரும் ஆர்வம் காட்டவில்லை. அதன் காரணமாக இராஜதந்திர ரீதியில் ஜனாதிபதி இந்தியாவினால் அவமதிக்கப்பட்டுள்ளதாக வெளிநாட்டலுவல்கள் அமைச்சின் வட்டாரங்கள் குறிப்பிடுகின்றன.

தமிழகத்து தேர்தல் களத்தில் கருணாநிதிக்கு எதிராக ஈழத் தமிழ் தொலைக்காட்சி நிகழ்ச்சி!

2009ம் ஆண்டு மாவீரர் நாளை முன்னிட்டு வளரி வலைக்காட்சிக்காக பிரான்சு ஈழத்துக் கலைஞர்களின் கைவண்ணத்தில் உருவான "மூடுதிரை" எனும் நிகழ்ச்சி கலைஞர்; கருணாநிதிக்கு எதிராக தமிழகத்தின் கப்டன் தொலைக்காட்சி ஒளிப்பரப்பாக்கி வருகின்றது.

சிறிலங்கா அரசுத் தலைவரை மையப்படுத்தி உருவாக்கம் பெற்றிருந்த இந்த நிகழ்ச்சி ஏற்கனவே பெருவாரியான தமிழர்களின் கவனத்தைப் பெற்றிருந்த நிலையில் மீண்டும் தமிழகத்தின் தேர்தல் களத்தில் முக்கிய கருவியாக கலைஞர் கருணாநிதிக்கு எதிராக கப்டன் தொலைக்காட்சி பாவிக்கின்றது.
வளரி வலைக்காட்சிக்காக நாடுகடந்த தமிழீழ அரசாங்கத்தின் தகவல்துறை துணை அமைச்சராக இருக்கின்ற சுதன்ராஜ் அவர்களினால் எழுதி நெறிப்படுத்தப்பட்டிருந்த மூடுதிரை நிகழ்ச்சியில் மகிந்தர் வேடமேற்று நடிந்திருந்தவர் கலைஞர் செல்வகுமார்.
இதுவரை காலமும் தமிழகத்து தொலைக்காட்சி நிகழ்ச்சிகளையே ஈழத் தமிழ் தொலைக்காட்சிகள் ஒளிபரப்பாக்கி வந்த நிலையில் முதன்முறையாக ஈழத்தமிழர் நிகழ்ச்சியொன்றை தமிழகத்து தொலைக்காட்சி ஒளிபரப்புகின்றமை இதுவே முதன்முறை என்பது இங்கு குறிப்பிடதக்கது.

Sunday, April 3, 2011

உலகக்கிண்ண போட்டிக்குப் பின்னால் உள்ள சிறிலங்காவின் கோரமுகம்

இந்திய- சிறிலங்கா அணிகள் மோதப் போகும் இந்த ஆட்டத்தைக் காண சிறிலங்கா ஜனாதிபதி மகிந்த ராஜபக்ஸ 30 பேர் கொண்ட பெரியதொரு பட்டாளத்துடன் மும்பைக்கு போகப் போகிறார்.

அரையிறுதி ஆட்டத்தில் சிறிலங்கா அணி நியுசிலாந்தை தோற்கடித்து- இறுதியாட்டத்துக்குத் தகுதி பெறுவதற்கு முன்னரே, சிறிலங்கா ஜனாதிபதி மகிந்த ராஜபக்ஸவின் செயலகம், சரத் பவாருடன் தொடர்பு கொண்டு 30 விஜபி ஆசனங்களை ஒதுக்கித் தருமாறு கேட்டுக் கொண்டது.

தெற்காசியாவில் இப்போது கிரிக்கெட் ஒரு அரசியல் இராஜதந்திர விளையாட்டாக மாறிக் கொண்டிருக்கிறது.

அரசியல் ரீதியாக மோதிக் கொள்ளும் பாகிஸ்தானும் இந்தியாவும் அரையிறுதி ஆட்டத்திலும் மோதின.

இந்தப் போட்டியைக் காண மொஹாலிக்கு வருமாறு பாகிஸ்தான் பிரதமர் கியானிக்கு அழைப்பு விடுத்தார் இந்தியப் பிரதமர் மன்மோகன்சிங்.

இந்தச் சந்தர்ப்பத்தைப் பயன்படுத்திக் கொண்ட பாகிஸ்தான் பிரதமர் கியானியும் இந்தியா சென்றார்.

மன்மோகன்சிங்கும் கியானியும் மொஹாலியில் அருகருகே அமர்ந்திருந்து போட்டியையும் பார்த்தனர். இடையிடையே, பேசியும் கொண்டனர்.

பாகிஸ்தான் பிரதமருக்கு மன்மோகன்சிங் விடுத்த அழைப்பைப் பார்த்து, சிறிலங்கா ஜனாதிபதி மகிந்த ராஜபக்ஸவும் நியுசிலாந்துப் பிரதமருக்கு ஜோன் கீயிடம் கொழும்புக்கு வருமாறு அழைப்பு விடுத்தார்

புலியைப் பார்த்து பூனை முதுகில் சூடு போட்டுக் கொண்ட கதையாக இது முடிந்து போனது.

கிரிக்கெட் போட்டியைப் பார்ப்பதற்கு இருக்கிற வேலைகளையெல்லாம் தூக்கிப் போட்டு விட்டு, நியுசிலாந்துப் பிரதமர் கொழும்புக்கு வந்து விடுவார் தப்புக்கணக்குப் போட்டு விட்டார் அவர்.

ஒருவேளை தன்னைப் போலத் தான் அவரும் இருப்பார் என்று கருதினாரோ தெரியவில்லை.

பாகிஸ்தானுக்கு மன்மோகன்சிங் அழைப்பு விடுத்த பின்னணியில் உள்ள முக்கியத்துவத்தில் ஆயிரத்தில் ஒரு பங்கு கூட, நியுசிலாந்துப் பிரதமருக்கு மகிந்த ராஜபக்ஸ விடுத்த அழைப்பில் இருக்கவில்லை.

அந்தளவுக்கு இது ஒரு அடி முட்டாள்தனமான அழைப்பு என்றே கூறலாம்.

தனது நிகழ்ச்சி நிரலை மாற்ற முடியாது என்று கூறி இந்த அழைப்பை நிராகரித்து விட்டார் நியுசிலாந்துப் பிரதமர்.

இது மகிந்த ராஜபக்ஸவுக்குப் பெரும் அவமானமாகப் போய் விட்டது.

ஆனாலும் அதை எப்படி வெளிக்காட்டிக் கொள்வது?

இதனால், நியுசிலாந்து பிரதமர் தனது தூதுவராக புதுடெல்லியில் உள்ள நியுசிலாந்து தூதுவரை அனுப்பி வைக்கவுள்ளார் என்று கூறி மகிந்த ராஜபக்ஸவின் பேச்சாளர் பந்துல ஜெயசேகர சமாளித்துக் கொண்டார்.

உலகக் கிண்ண கிரிக்கெட் இறுதியாட்டத்துக்கு சிறிலங்கா அணி தகுதி பெற்றதும், எப்படியும் கிண்ணத்தைக் கைப்பற்றி முரளிதரனைக் கௌரவிக்க வேண்டும் என்று மகிந்த ராஜபக்ஸ கூறினார்.

நாளை 2ம் திகதி உலகக்கிண்ண கிரிக்கெட் போட்டியின் இறுதியாட்டம் நடைபெறப் போகிறது.

இதில் சிறிலங்கா அணி வெற்றி பெறுமா- இந்திய அணி வெற்றி பெறுமா என்று ஆரூடம் சொல்லும் நிலையில் நாம் இல்லை.

ஆனால் இந்தப் போட்டியில் சிறிலங்கா அணி வெற்றி பெறுவதானது தமிழர்களுக்கு எதிரான சிங்களப் பேரினவாதத்தின் கரங்களை பலப்படுத்தப் போகிறது என்பது மட்டும் உண்மை.

அது எப்படி என்று விபரிக்க முன்னர் ஒரு சிறிய விடயத்தை கூற வேண்டும்.

முன்னரெல்லாம், பெரும்பாலான ஈழத்தமிழர்கள் இந்திய அணியையே ஆதரித்து வந்தனர்.

ஆனால் சிறிலங்கா அணி 1996இல் உலகக் கிண்ணத்தை வென்ற பின்னர், இளம் தமிழ் சமூகம் சிறிலங்கா அணியின் பக்கம் சாயத் தொடங்கியது.

இப்போதும் பெரும்பாலான இளம் சந்ததியினர் அத்தகைய வெறித்தனமான ஆதரவுடன் இருப்பதை யாரும் மறுக்க முடியாது.

வெளிநாடுகளில் சிறிலங்கா அணியை புறக்கணிப்போம் என்று குரல்கள் எழுப்பப்பட்டாலும் தாயகத்தில் நிலைமை அவ்வாறு இல்லை என்பதை ஏற்கத் தான் வேண்டும்.

அரசியல் வேறு, விளையாட்டு வேறு, இரண்டையும் கலக்கக் கூடாது என்று பொதுவாக சொல்லப்படுவதுண்டு.

இது உண்மை தான்.

தென்னாபிரிக்காவின் நிறவெறிக் கொள்கையால் அந்த அணியை சர்வதேச கிரிக்கெட் சபை பல ஆண்டுகளாக ஒதுக்கி வைத்திருந்தது.

சிறிலங்கா அணி மீதும் அத்தகைய தடை விதிக்கப்பட வேண்டும் என்ற கோரிக்கைகள் விடுக்கப்பட்டாலும் கூட அது சாத்தியமாகவில்லை.

ஆனால் கிரிக்கெட் போட்டிகளை சிறிலங்கா வெறும் விளையாட்டாக மட்டும் எடுத்துக் கொள்வில்லை.

அதை ஒரு நிழல் அரசியலாகவே நடத்துகிறது.

இந்த உண்மையைப் புரிந்து கொள்ளாதவர்கள் தான் அரசியல் வேறு விளையாட்டு என்று நியாயம் கூறிவருகின்றனர்.

இளந்தலைமுறையிடம் ஏற்பட்டுள்ள சிறிலங்கா அணி மீதான கவர்ச்சி ஆபத்தானதொன்று என்ற உண்மை அவர்களுக்குப் புரியாதிருப்பது ஆச்சரியம் தான்.

இப்போது விவகாரத்துக்கு வருவோம்.

உலகக் கிண்ணத்தை சிறிலங்கா அணி மீளக் கைப்பற்றுவது எப்படி சிங்களப் பேரினவாதத்தின் கரங்களை வலுப்படுத்தப் போகிறது என்ற கேள்விக்கான பதிலை இனிமேல் நாம் தேடுவோம்.

இன்றையதினம் (ஏப்ரல்1) கொழும்பில் இருந்து வெளியான ஆங்கில நாளிதழ் ஒன்றில் ஐ.நாவுக்கான சிறிலங்காவின் பிரதி நிரந்தர வதிவிடப் பிரதிநிதி மேஜர் ஜெனரல் சவீந்திர சில்வாவின் பேட்டி ஒன்று பிரசுரமாகியுள்ளது.

மேஜர் ஜெனரல் சவீந்திர சில்வா ஒரு போர்க்குற்றவாளி என்பது அனைவருக்கும் தெரிந்த விடயம்.

அவர் யார் என்ற விபரங்களை எழுதி இந்தப் பத்தியை நீட்டிக்க விரும்பவில்லை.

இந்தப் பேட்டியில் சவீந்திர சில்வா, ஒரு வீத இராணுவப் பலத்தைக் கூட மிச்சமில்லாமல் புலிகளை தாம் அழித்து விட்டதாகக் கூறியுள்ளார்.

அதையெல்லாம் விட்டு விடுவோம்.

அவர் உலகக் கிண்ண கிரிக்கெட் போட்டி பற்றிக் கூறியுள்ள இரண்டு விடயங்கள் தான் எமக்குத் தேவையானது.

முதலாவது விடயம்- இறுதிப்போட்டியில் சிறிலங்கா அணி பெறும் வெற்றியானது- புலிகளுக்கு எதிரான போரில் உயிர் தியாகம் செய்த படையினருக்கு அவர்கள் செலுத்தும் காணிக்கை என்று கூறியுள்ளதாகும்.

அடுத்தது- இந்தப் போட்டியில் வெற்றி பெறுவதன் மூலம் சர்வதேச அளவில் சிறிலங்காவின் கௌரவத்தை உயர்த்திக் கொள்ள முடியுமாம்.

விளையாட்டில் பெறும் வெற்றியை போரில் இறந்த படையினரைக் கௌரவிப்பதாக அமையும் என்று சிறிலங்காவின் உயர்நிலை அரசுப் பிரதிநிதியே கூறியுள்ளார்.

அவர் இப்போது ஒரு இராணுவ அதிகாரி அல்ல.

ஐ.நாவுக்கான பிரதிநிதி என்ற வகையில் அவரது இந்தக் கருத்து சாதாரணமானதொன்றல்ல.

இந்தப் போரில் தமிழர்கள் எந்தளவுக்கச் சீரழிக்கப்பட்டனர் என்பது உலகறிந்த விடயம்.

பயங்கரவாதத்துக்கு எதிரான – மனிதாபிமான போர் என்ற பெயரில் தமிழ் மக்களை அழித்தொழிக்கவும், அடக்கியாளவும் நடத்தப்பட்டதே இந்தக் கொடிய யுத்தமாகும்.

அப்படியிருக்கும் போது போரில் இறந்த படையினருக்கு உலகக் கிண்ணத்தை அர்ப்பணிக்க நினைக்கும் சிறிலங்கா அரசின் நோக்கத்தை எப்படி வெறும் விளையாட்டுத்தனமானது என்று கூற முடியும்?

ஒருபுறத்தில் முரளிதரனை கௌரவிக்க உலகக் கிண்ணத்தைக் கைப்பற்ற வேண்டும் என்கிறார் சிறிலங்கா ஜனாதிபதி.

ஆனால் அவரது அரசின் பிரதிநிதியாக ஐ.நாவில் பணியாற்றுபவரோ போரில் மாண்ட சிங்களப் படையினருக்கான காணிக்கை என்கிறார்.

அப்படியானால் யார் கூறியிருப்பது உண்மை?

இப்போது சிறிலங்கா அரசின் கௌரவம் எந்தளவுக் சந்தி சிரித்துப் போய் இருக்கிறது என்பது அனைவரும் அறிந்ததே.

விடுதலைப் புலிகளுக்கு எதிரான போரின் போது நிகழ்த்திய போர்க்குற்றங்களால் தான் சிறிலங்காவின் புகழ் மங்கி பெரும்பாலான நாடுகள் முகம் கொடுக்காத அளவுக்கு நிலைமை உள்ளது.

போரின்போது நிகழ்த்திய அக்கிரமங்களால் தான் சிறிலங்காவுக்கு இந்தநிலை வந்தது.

இந்த நிலையை மாற்றியமைக்கவே சிறிலங்காவுக்கு உலகக் கிண்ணம் தேவைப்படுகிறது.

இதை நாங்கள் ஊகத்தில் சொல்லவில்லை.

சவீந்திர சில்வா தான் இப்படிக் கூறியுள்ளார்.

கிரிக்கெட்டில் பெறும் வெற்றி மூலம் சிறிலங்காவின் கௌரவத்தை மீட்கலாம் என்று அவர்கள் நினைக்கிறார்கள்.

கிரிக்கெட்டை மைதானத்துடன் நிறுத்திக் கொள்ளும் விளையாட்டாக அவர்கள் நினைக்கவில்லை.

அதற்குள் எத்தனை அரசியல் இலக்குகள்- வியூகங்களை வைத்திருக்கிறார்கள் என்பதை தமிழ்ச் சமூகம் தெரிந்து கொள்ள வேண்டும்.

சிறிலங்கா அணியின் வெற்றியானது தமிழர்களின் எதிர்பார்ப்புகள், அபிலாசைகளைக் குழி தோண்டிப் புதைப்பதற்கும், அவர்களை நடுத்தெருவுக்கு விரட்டுவதற்குமே சிறிலங்காவுக்கு உதவும்.

அரசியல் வேறு விளையாட்டு வேறு என்ற வாதத்தை தூக்கிப் பிடித்துக் கொள்வது தமிழர்களின் முட்டாள்தனம் என்பதை விட வேறெப்படிச் சொல்ல முடியும்.

ஈழநேசன்

Saturday, April 2, 2011

விடுதலைப்புலிகள் தலைவர் பிரபாகரன் நலமுடனும், பாதுகாப்புடனும் இருக்கிறார் என்றும், வெகுவிரைவில் அவர் மக்கள் முன்தோன்றி உரிய நேரத்தில் உரை நிகழ்த்துவார் என்றும் விடுதலைப் புலிகளின் புதிய இணைய தளம் www.lttepress.com தெரிவித்துள்ளது.

சென்ற ஆண்டு நடந்த இறுதிகட்ட போரில் விடுதலைப்புலிகள் முற்றிலு மாக அழிக்கப்பட்டு விட்டதாக இலங்கை அரசு அறிவித்த பிறகு, விடுதலைப்புலிகளின் அதிகாரப் பூர்வ இணையதளங்கள் காணாமல் போயின. அதன் பிறகு விடுதலைப் புலிகளுக்கென்று அதிகாரப்பூர்வமாக இணையதளம் இல்லாமல் இருந்தது. தற்போது எல்டிடிஈ பிரஸ்.காம் என்ற புதிய இணைய தளம் உருவாக்கப் பட்டு, விடுதலைப்புலிகளின் அதிகாரப்பூர்வ இணையதளம் என்று அறிவிக்கப்பட்டுள்ளது.
அந்த இணைய தளத்தில் தமிழீழ விடுதலைப்புலிகள் செய்தி தொடர்பாளர் ச.தமிழ்மாறன் வெளியிட்டுள்ள அறிக்கையில் கூறியிருப்பதாவது:
எமது அன்பிற்குரிய தமிழீழ மக்களுக்கு,
தமிழீழ தேசியத் தலைவர் பிரபாகரன் பற்றி இலங்கை அரசும், சில சர்வதேச சக்திகளினாலும் பரப்பப்பட்ட மாறுபட்ட தவறான தகவல்களை எமது இயக்கம் முற்றாக மறுக்கின்றது.
தமிழீழ தேசியத் தலைவர் பிரபாகரன் மிகுந்த நலமுடனும், பாதுகாப்புடனும் உள்ளார். தேசியத் தலைவர் பற்றிய தவறான செய்திகளுக்கு எமது மக்கள் செவிசாய்க்காமல் எமது விடுதலைப் போராட்டத்தின் அடுத்தகட்ட நகர்வுக்கு வீறுடன் களம் அமைக்குமாறு வேண்டப்படுகின்றனர்.
அதோடு தேசியத் தலைவர் வெகுவிரைவில் மக்கள் முன் தோன்றி உரிய நேரத்தில் உரை நிகழ்த்துவார்.
சர்வதேச ஒழுங்குகளுக்கு ஏற்ப எமது மக்களின் தற்போதைய நிலை, இலங்கை அரசின் நோக்கம் போன்றவற்றை கருத்தில் கொண்ட எமது தேசியத் தலைவர் விடுதலைப் போராட்டத்தின் அடுத்தகட்ட நகர்வை புதிய வடிவில் நெறிப்படுத்தியுள்ளார்.
எமது தாயக விடுதலைப் போராட்ட வரலாற்றில் பாரிய இழப்புகளை எமது மக்களுடன் நாம் சந்தித்துள்ளோம்.
இழப்புகள் என்பது எமக்கும், எமது மக்களுக்கும் புதியவைகள் அல்ல. சிங்கள அரசின் சிந்தனைகளைத் தாண்டி எமது விடுதலைப் போராட்டம் புதிய வடிவம் பெற்று வீறுடன் எழுந்து நிற்கின்றது.
சிங்கள பேரினவாத அரசு எமது மக்களின் சுயநிர்ணய உரிமைகளுக்கு மதிப்பளித்து எமது மக்களுக்கு சரியான தீர்வு திட்டத்தை முன்வைக்காத வரை சிங்கள பேரினவாதத்திற்கு எதிராக எமது விடுதலைப்போர் எமது தேசியத் தலைவர் பிரபாகரன் தலைமையில் மாறுபட்ட வடிவங்களுடன் தொடர்வதுடன், எமது மக்களை ஏமாற்ற நினைக்கும் எந்த சக்தியினையும் நாம அனுமதிக்கப்போவதில்லை என்பதை தெரிவித்துக் கொள்கின்றோம்.
புலிகளின் தாகம் தமிழீழ தாயகம்.

Friday, April 1, 2011

மீண்டும் புலிகள் தாக்குதல்: இலங்கை ராணுவத்தினர் 4 பேர் பலி?

இலங்கை கப்பற்படைக்கு சொந்தமான படகு ஒன்று முல்லைத்தீவின் சாலை கடற்படை முகாமிலிருந்து சுண்டிக்குளம் முகாம் நோக்கி சென்றது. அதில் கடற்படை வீரர்கள் 4 பேரும், ஆயுதங்களுடன் சென்றுள்ளனர். ஆயுதங்களுடன் சென்ற அவர்கள் திடீரென மாயமானார்கள்.

இவர்கள் மாயமானது வள்ளம் கடற்படையினர் மேற்கொண்ட தேடுதல் நடவடிக்கையில் கண்டுபிடிக்கப்பட்டுள்ளது. அவர்கள் பயணம் செய்த படகு, கண்டுபிடிக்கப்பட்டதையடுத்து, வீரர்கள் மர்ம நபர்களால் கடத்தப்பட்டிருக்கலாம் அல்லது கொல்லப்பட்டிருக்கலாம் என்ற சந்தேகம் இலங்கை கடற்படைக்கு ஏற்பட்டது.

இந்நிலையில் தமிழ் தேசிய எழுச்சி படை என்கிற பெயரில் இயங்கும் புலிப்படை பிரிவு இதற்கு பொறுப்பேற்றுள்ளதாக செய்திகள் வெளியாகி உள்ளன. இச்செய்தி இலங்கை அரசுக்கு மிகப்பெரிய அபாய எச்சரிக்கையை ஏற்படுத்தியுள்ளது.
இதனால் கலங்கிபோன இலங்கை ராஜபக்சே அரசு, இறந்துபோனவர்களின் உடலை தேடும் பணிக்கு உதவி செய்யுமாறு இந்திய அரசை கேட்டுக்கொண்டுள்ளதாகவும், இதற்கு இந்திய அரசு ஒப்புக்கொண்டுள்ளதாகவும் செய்திகள் வெளியாகி உள்ளன.

கடந்த வாரம் ஹபரணைக் காட்டுப்பகுதியில் திடீர் தாக்குதல் நடைபெற்றது. அதில் இலங்கை ராணுவத்தின் 2 கட்டளை அதிகாரி, ஒரு கேப்டன், 2 மேஜர்கள் கொல்லப்பட்டனர். இதற்கு தமிழ் தேசிய எழுச்சி படை பொறுப்பேற்றதாக செய்திகள் வெளியானது குறிப்பிடத்தக்கது.

Wednesday, March 30, 2011

வேட்பாளரை அடிக்கிறதெல்லாம் ஒரு மேட்டரே இல்லை! – சோ

தனது வேட்பாளரை விஜயகாந்த் அடித்ததில் எந்தத் தவறும் இல்லை. மக்களைப் பொறுத்தவரை இது ஒரு மேட்டரே இல்லைஇ என்று கூறியுள்ளார் அரசியல் விமர்சகரும் பத்திரிகையாளருமான சோ.

தர்மபுரி தொகுதி தேமுதிக வேட்பாளர் பாஸ்கரனைஇ மக்கள் முன்னிலையில் சரமாரியாக விஜயகாந்த் அடித்த விவகாரம் பெரும் சர்ச்சையைக் கிளப்பியுள்ளது.

இதுதொடர்பாக விஜயகாந்துக்கெதிரான கடும் விமர்சனங்களை முன் வைத்துள்ளனர் பல கட்சித் தலைவர்களும். ஆனால் விஜயகாந்தோ என் ஆளைத்தானே அடிச்சேன். உங்களுக்கென்ன வந்தது… என்கிட்ட அடிவாங்கினவன் மகாராஜனாய் வருவான் என்று கருத்து தெரிவித்துள்ளனர்.

இதுகுறித்து பத்திரிகையாளர் சோவிடம் கருத்து கேட்கப்பட்டது. விஜயகாந்தை போயஸ் தோட்டம் பக்கம் கொண்டு போய் சேர்த்ததில் முக்கிய பங்கு இவருக்கு உண்டு என அரசியல் வட்டாரத்தில் கூறப்படுவதால் சோ கருத்தையும் கேட்க ஆவலாக இருந்தனர் பத்திரிகையாளர்கள்.

இதுகுறித்து அவர் கருத்து கூறுகையில் “எனக்கென்னமோ இது ஒரு பெரிய விஷயமாவே படல. வேட்பாளரை அடிப்பதையெல்லாம் சீரியஸா எடுத்துக்க முடியுமா… அவரு ஏதோ வேகத்துல அடிச்சிருப்பார். அவங்க கட்சி ஆள்தானே… இதெல்லாம் ஒரு மேட்டரே இல்ல. ஜனங்க இதை சீரியஸாகவும் எடுத்துக்க மாட்டாங்க” என்றார்.

இதைக் கேட்ட திமுக கூட்டணியினர் ‘இதே தவறை திமுக தலைவர்கள் யாராவது செய்திருந்தால் சோ இதே கருத்தைத்தான் சொல்லியிருப்பாரா?’ என்று திருப்பிக் கேட்கின்றனர். கேள்வி நியாயம்தானே!

ebook